Paani ke bina kheti possible nahi hai. Lekin paani ka sahi use karna bhi utna hi zaruri hai. Bahut se kisan aaj bhi purane tarike se khet mein paani dete hain jisme bahut zyada paani waste hota hai. Sprinkler irrigation ek aisa tarika hai jo bilkul baarish ki tarah kaam karta hai. Paani upar se gir ta hai aur poore khet mein barabar faelta hai. Isse paani bhi bachta hai aur fasal bhi acchi hoti hai.
Sprinkler Irrigation Kya Hota Hai?
Sprinkler irrigation mein paani ko pipes ke zariye khet tak pahunchaya jaata hai. Pipes ke upar chhote chhote sprinkler heads lage hote hain. Ye sprinkler heads ghoomte hain aur paani ko hawa mein chhhidakte hain. Paani chhoti chhoti boonden banke poore khet mein gir ta hai. Bilkul waise jaise baarish hoti hai. Isliye isko overhead irrigation bhi bolte hain. Ye system chhote aur bade dono tarah ke khetoon ke liye kaam karta hai.
Ye System Kaise Kaam Karta Hai?
Sabse pehle ek pump paani ko source se uthata hai. Source kuch bhi ho sakta hai — nadi, talab, kuaan ya canal. Pump paani ko pressure ke saath main pipe mein bhejta hai. Main pipe se sub main pipes nikalti hain. Sub main pipes se lateral pipes connect hoti hain. In lateral pipes ke upar riser pipes lagi hoti hain. Riser pipes seedhi khadi hoti hain aur unke upar sprinkler heads lage hote hain. Jab paani pressure ke saath sprinkler head tak pahunchta hai toh sprinkler tezi se ghoomta hai aur paani ko charon taraf chhidakta hai. Ye paani boonden banke poore khet mein girta hai.
Sprinkler System Ke Main Parts
Pump is poore system ka sabse pehla aur zaruri hissa hai. Pump hi paani ko itna pressure deta hai ki woh saari pipes mein travel kar sake aur sprinkler tak pahunch sake. Pump ka size khet ke hisaab se choose kiya jaata hai.
Filter bhi bahut zaruri part hai. Paani mein jo bhi gandagi hoti hai wo filter mein rok li jaati hai. Agar gandagi sprinkler tak pahunch gayi toh sprinkler ka chhota sa hole band ho jaayega. Isliye filter ko hamesha saaf rakhna chahiye.
Main pipe woh badi pipe hai jo pump se paani lekar aati hai. Ye pipe zameen ke andar ya upar dono jagah lagai ja sakti hai. Sub main pipe main pipe se chhoti hoti hai aur lateral pipes tak paani pahunchati hai. Lateral pipes khet ki rows ke saath saath bikhti hain. Inhi ke upar riser pipes lagi hoti hain.
Riser pipe ek seedhi khadi pipe hoti hai jo zameen se upar nikli hoti hai. Iske upar sprinkler head laga hota hai. Sprinkler head wo part hai jo actually paani ko chhidakta hai. Ye alag alag type ke hote hain. Koi full circle mein paani chhidakta hai, koi half circle mein aur koi quarter circle mein.
Sprinkler Irrigation Ke Fayde
Sabse bada fayda ye hai ki paani poore khet mein barabar milta hai. Flood irrigation mein aisa nahi hota — kuch jagah zyada paani jaata hai aur kuch jagah kam. Sprinkler mein ye problem nahi hoti. Har jagah barabar paani milta hai.
Doosra bada fayda paani ki bachat hai. Flood irrigation ke mukable mein sprinkler se kaafi kam paani use hota hai. Paani hawa mein chhidka jaata hai aur seedha mitti mein jaata hai. Behna nahi padta, bah nahi jaata.
Teesra fayda ye hai ki iss system ko aadat wali zameen par bhi use kar sakte hain. Matlab jahan zameen upar neeche hai, dhali hui hai, wahan bhi sprinkler system kaam karta hai. Flood irrigation wahan possible nahi hota.
Chautha fayda ye hai ki is system ke zariye fertilizer bhi de sakte hain. Paani ke saath fertilizer mix karo aur sprinkler se poore khet mein barabar pahunch jaata hai. Koi ek jagah zyada nahi, koi jagah kam nahi.
Konsi Fasal Ke Liye Best Hai?
Sprinkler irrigation almost har fasal ke liye kaam karta hai. Gehu, dhan, makka jaise grains ke liye bahut accha hai. Vegetables jaise gobhi, palak, matar ke liye bhi kaam karta hai. Nursery mein chhote chhote paudhe ugane ke liye bhi ye system bahut useful hai kyunki paani bahut gently girta hai aur chhote paudhon ko nuksan nahi hota. Lawn aur garden ke liye bhi log sprinkler use karte hain.
System Ki Dekhbhaal Kaise Karein?
Sprinkler heads ko regularly check karo. Dekho ki paani sahi direction mein ja raha hai ya nahi. Kabhi kabhi sprinkler head thoda ghoom jaata hai aur paani galat jagah jaane lagta hai. Use seedha karo. Filter ko hafte mein ek baar saaf karo. Pipes mein koi leak toh nahi hai yeh bhi check karo. Agar kisi sprinkler ka hole band ho gaya hai toh use nikaalo aur paani se saaf karo. Season ke baad poora system flush karo aur saari pipes ko saaf jagah rakh do.
Sprinkler System Lagane Mein Kitna Kharcha Aata Hai?
Setup ka kharcha thoda zyada lagta hai shuru mein. Lekin is kharche ke badle mein jo bachat hoti hai woh kaafi zyada hoti hai. Paani ka kharcha kam hota hai. Labour bhi kam lagti hai. Fasal bhi acchi aati hai. Aur agar government ki subsidy mil jaaye toh setup cost aur bhi kam ho jaati hai. Bahut si state governments drip aur sprinkler dono ke liye subsidy deti hain. Apne nazdiki krishi kendra mein jaake pata kar sakte hain.
Sprinkler irrigation ek smart investment hai kisan ke liye. Ek baar lag jaaye toh saalon tak kaam deta hai. Paani bachta hai, mehnat bachti hai aur kheti acchi hoti hai. Jo kisan ek baar try karta hai woh dobara purani method pe wapas nahi jaata. Agar aap bhi apni kheti ko behtar banana chahte hain toh sprinkler irrigation ke baare mein zaroor sochein.